ពេល​កូវីដ អ្នក​ដំណើរ​​​តាម អាកាសយានដ្ឋានកម្ពុជា ធ្លាក់​ចុះ​ ៨០ដង

February 17, 20211min813

ដោយ អាន ស៊ី​ថាវ

ECOPEDIA (ប្រព័ន្ធព័ត៌មានសេដ្ឋកិច្ច​កម្ពុជា)

បច្ចុប្បន្ន​ អ្នក​ដំណើរ​ដែល​ឆ្លង​កាត់​ អាកាសយានដ្ឋាន​អន្តរជាតិ​ភ្នំពេញ​ មាន​ប្រមាណ ៥០០​នាក់ ក្នុង​មួយ​ថ្ងៃ ។​

នៅក្នុង​ដើមឆ្នាំ ២០២០ នៅពេល​​ដែល​រង​កូវិដ១៩​ ចំនួន​អ្នក​ធ្វើដំណើរ​ឆ្លង​កាត់​តាម​ អាកាសយានដ្ឋាន​អន្តរជាតិ​ភ្នំពេញ បាន​ធ្លាក់​ចុះជិត ៨០% បើ​ធៀប​និង​រយៈពេល​ដូច​គ្នា​កាលពីឆ្នាំ​មុន​។ ហើយ​ការ​ដឹក​នាំទំនិញ​ ក៏​ធ្លាក់​ចុះ​ដែរ។​

ការ​ធ្លាក់​នេះ ក៏​បាន​បណ្ដាល​​​​ប៉ះពាល់​ដល់​​មូលដ្ឋាន​សេដ្ឋកិច្ច​កម្ពុជា ។​ ​មូលដ្ឋាន​សេដ្ឋកិច្ច​កម្ពុជា​រង​ផល​ប៉ះពាល់​ធ្ងន់ធ្ងរ ក្នុង​នោះ​មាន វិស័យទេសចរណ៍, ឧស្សាហកម្មនាំចេញ និងផ្នែកសំណង់ ដែលទាំងអស់នេះតំណាងឱ្យជាង ៧០ភាគរយនៃកំណើនសេដ្ឋកិច្ច និង​ផ្តល់ការងារ​មាន​កម្រៃ​ប្រមាណជា ៤០ភាគរយ នៃការងារសរុបរបស់ប្រទេស។

បើ​និយាយអំពី​ពាណិជ្ជកម្ម​ទំនិញ​របស់​កម្ពុជាវិញ ក៏​មាន​ធ្លាក់ចុះដែរ​នៅក្នុង​ឆ្នាំ ២០២០ ក្នុង​នោះ នាំ​ចេញធ្លាក់​ចុះ (-16%) និង​នាំ​ចូល​វិញ ធ្លាក់​ចុះ (-11%) នេះ​បើយោងតាម​ការ​ព្យាករណ៍​របស់ធនាគារ​ពិភពលោក​ប្រចាំ​កម្ពុជា ។

ដោយ​ឡែក​ បើ​និយាយ​អំពី ផល​ប៉ះពាល់​លើ​វិស័យ​ទេសចរណ៍​នៅ​លើ​ពិភពលោក​វិញ​ ក៏​ថយ​ចុះ ដែល​​អង្គការ​ទេសចរណ៍​អន្តរជាតិ បាន់ស្មាន​ជា​តម្លៃ​ ៨០ពាន់​លាន​ដុល្លារ​អាមេរិក នៅ​ជុំ​វិញ​ពិភពលោក​។ ចំណែក​កម្ពុជា​វិញ ត្រូវ​បាន​ក្រួសួង​ទេសចរណ៍​កម្ពុជា​ថា​នឹង​ខាត​បង់​ទឹក​ប្រាក់​​ប្រមាណ ៣​ពាន់​លាន​ដុល្លារ​នៅ​ក្នុង​ឆ្នាំ​២០២០ ពីផល​​ប៉ះពាល់​អាក្រក់​ដែល​កើត​ឡើង​ពី​ការ​រីក​រាល​ដាល​នៃ​ជម្ងឺឆ្លង កូវិដ​១៩។

បច្ចុប្បន្ន អាជីវកម្ម​ឬ​សហគ្រាសទាំង​ឡាយ​ដែល​ពាក់​ព័ន្ទ​និង​វិស័យ​ទេសចរណ៍ ​ប្រមាណជិត​៣ពាន់​សហគ្រាស ត្រូវបិទ​ទ្វា ហើយ​ពលកម្ម​ប្រមាណ ៤​ម៉ឺន​៥​ពាន់​នាក់​ គ្មានការងារ​ធ្វើ​ នេះ​​បើ​យោង​តាម​ក្រសួង​ទេសចរណ៍​កម្ពុជា ។ កន្លង​មក​​​ ​វិស័យ​ទេសចរណ៍​កម្ពុជា​បង្កើត​ការងារ​ បាន​ប្រមាណ​​៦០ម៉ឺននាក់​នៅ​ទូទាំង​ប្រទេស និង​បាន​ចូល​រួម​ដល់​សេដ្ឋកិច្ច​ជាតិ ប្រមាណ ជាង​១២% ។

ដោយសារមូលហេតុនេះហើយ ​បាន​ជា​​នៅក្នុងឆ្នាំ២០២០ កំណើនសេដ្ឋកិច្ច​ត្រូវ​បាន​រំពឹងទុកថា​នឹងមានល្បឿនយឺតបំផុតមិនដែលធ្លាប់ជួបប្រទះតាំងពីឆ្នាំ១៩៩៤មក គឺ​មាន​កំណើន​ក្រោម​សូន្យ​មាន​ន័យ​ថា​ សកម្មភាព​ផលិតកម្ម​គាំទ្រ​ដល់​កំណើន​សេដ្ឋកិច្ច​​កម្ពុជា​បាន​​ផ្អាក ឬ​មាន​សកម្មភាព​តិច​ជាង​មុន​។

បច្ចុប្បន្ន មូលដ្ឋាន​ និង​សកម្មភាព​ដែល​គាំទ្រ​​ដល់​វិស័យ​ទេសចរណ៍​កម្ពុជា មាន​​សកម្មភាព​ច្រើន​ជាង​មុន ក្នុង​នោះ មានការ​អនុញាតិ​ឲ្យ​ក្រុមហ៊ុន​​អាកាស​ ចាប់​ផ្ដើម​ប្រតិបត្តិការ​របស់​ខ្លួន​សារជាថ្មី ។

បច្ចុប្បន្ន​ អ្នក​ដំណើរ​ដែល​ឆ្លង​កាត់​ អាកាសយានដ្ឋាន​អន្តរជាតិ​ភ្នំពេញ​ មាន​ប្រមាណ ៥០០​នាក់ ក្នុង​មួយ​ថ្ងៃ ។​ ចំនួន​នេះ បើ​ធៀប​ទៅនឹង មុន​ពេលមាន​កូវី គឺ​កម្ពុជា មានដំណើរ​ឆ្លង​កាត់​ជាង ៤ម៉ឺននាក់ក្នុង​មួយ​ថ្ងៃ ក្នុង​នោះ អាកាសយានដ្ឋាន​អន្តរជាតិ​ភ្នំពេញ​ ទទួល​​អ្នក​ដំណើរ​បាន​ ១ម៉ឺន ៧ពាន់​ក្នុង​មួយ​ថ្ងៃ​៕


អំពីយើង

អ៊ីកូភីឌៀ (ECOPEDIA) ជា​គេហទំព័រ​ព័ត៌មាន​សេដ្ឋកិច្ច​តែ​មួយ​គត់​ ដែល​​ ​ផ្ដោ​ត​សំខាន់​លើ​ផ្នែក​សេដ្ឋកិច្ច​ ពាណិជ្ចកម្ម និង​​ដំណើរ​ការ​អភវិឌ្ឍ​អាជីវកម្ម នៅ​ក្នុង​ប្រទេស​កម្ពុជា។

អ៊ីកូភីឌៀ ផ្ដល់​ព័ត៌មាន​​សេដ្ឋកិច្ច​​សម្រាប់​ ពលរដ្ឋ​និង​វិស័យ​ឯកជន ​ប្រើប្រាស់ ដើម្បី​ឈាន​ដល់​ការ​សម្រេច​ចិត្ត​ដ៏​ត្រឹម​ត្រូវ​ ក្នុង​ជីវភាព​ប្រចាំ​ថ្ងៃ ។


ទំនាក់ទំនងយើង

087 21 29 26


Contact to Listing Owner

Captcha Code